Abanyeshuri 89.1% batsinze ibizamini bya Leta bisoza amashuri yisumbuye (amafoto)

Muri rusange, abanyeshuri biyandikishije gukora ibizamini bya Leta byo mu mwaka wa 2024/2025 ni 106,418, naho abakoze ibizamini ni 106,079, bingana na 99.7%.

Akarere ka Kayonza kaje ku mwanya wa mbere mu gutsindisha ibizamini ku kigero cya 96.9%, Kirehe ikurikiraho ku kigero cya 95.6%, naho Rulindo iza ku mwanya wa gatatu  kuri 94.9%.

Mu mashuri y’ubumenyi rusange, abiyandikishije gukora ibizamini bari 61,942, abakoze ibizamini 61,737, abakosowe bari 61,683, naho abatsinze bakaba 51,667, igipimo cy’intsinzi rusange kikaba 83.8%.

Mu mashuri ya tekiniki n’umenyingiro (TSS), abiyandikishije gukora ibizamini bari 36,254, abakoze ibizamini 36,141, abakosowe 36,130, naho abatsinze bakaba 35,393, igipimo cy’intsinzi kikaba 98.0%.

Muri ‘Professional Education’, abiyandikishije gukora ibizamini bari 8,222, abakoze ibizamini 8,201, abakosowe 8,184, naho abatsinze bakaba 7,349, igipimo cy’intsinzi rusange kikaba 89.8%.

Minisitiri w’Uburezi, Joseph Nsengimana, yavuze ko gutangaza amanota muri Nzeri (09) bizafasha abanyeshuri batsinze ndetse n'abashaka gusubiramo neza gutangirira  rimwe n'abandi amasomo.

Yagize ati: “Bizafasha abanyeshuri; ari abatsinze bashaka kujya muri za Kaminuza, cyangwa abatabashije gutsinda bakaba basubiramo bafite umwanya uhagije wo gutangirana n’abandi.”

Abanyeshuri bahize abandi mu byiciro bitandukanye bashimiwe bahabwa ibihembo ndetse basabwa gukomeza kwitwara neza.

Dore uko wareba amanota:

Hari uburyo bubiri wakwifashisha ushaka kureba amanota wabonye mu kizamini cya Leta:

1) Kuri Telephone

2) Kuri internet

Kuri telefone kurikiza ibi bikurikira:

1) Jya ahandikirwa ubutumwa bugufi (SMS), wandike Code (nimero iranga umunyeshuri), ID (nimero y’Indangamuntu).

2) Ohereza kuri 8888.

Urugero: Andika 603030702023 1200580002643000 wohereze kuri 8888.

Kuri interinet nyura kuri iyi link: https://secondary.sdms.gov.rw/