RURA yatangaje ibiciro bishya by'amashanyarazi

RURA ivuguruye ibiciro by’amashanyarazi nyuma y’imyaka itanu, kuko ibyakoreshwaga byashyizweho muri 2020. Icyo gihe impamvu zashingiweho  zari impinduka zitandukanye mu bukungu ndetse n'ibikorwa bibyara amashanyarazi biriho ubu. RURA ivuga ko byakozwe kugira ngo u Rwanda rurusheho kwihaza mu bijyanye n'amashanyarazi.

Mu rwego rwo gushyigikira ikoreshwa ry'amashanyarazi mu ngo ku rwego rw'ibanze no kugeza amashanyarazi kuri bose, icyiciro cya mbere cy'ingo, cyavanwe kuri 15 KWh gishyirwa kuri 20 KWh, kandi igiciro gisanzweho nticyahindutse, cyagumye ku mafaranga 89 kuri KWh.  Naho izikoresha Kilowateli ziri hagati ya 20 na 50 bazajya bishyura 310 kuri kilowateli. Nazo iziri hejuru na 50 KWh ni 369.

Amashuri, ibitaro n’amavuriro nabyo byashyiriweho ibiciro byorohereza imikorere yabo mu rwego rwo kubyohohereza nk'ibigo byita ku mibereho myiza y'abaturage no kubyongerera ubushobozi. Itangazo rya RURA ivuga ko iki cyiciro cyabaye 214 kuri kilowateli. 

Naho inyubako z'ubucuruzi n'ibikorerwamo ibindi bikorwa bitandukanye n'izo guturwamo zikoresha KWh kugeza 100 ni 355. Naho izikoresha hejuru ya Kilowateli ni 376. Naho serivisi z'isakazamakuru harimo radio na televiziyo ni 289.

Ni mu gihe amahoteli akoresha umurimo w'amashanyarazi utagera kuri kilowateli 660 000 KWh ku mwaka bazajya bishyura 239/Kwh. Naho izirenzeho ni 175/KWh.

Inganda n'ibigo by'ubucukuzi by'amabuye y'agaciro n'iziyatunganya bikoresha hagati ya KWh 5, 000 na 100,000 nabo bazishyura amafaranga 175. Ni kimwe kandi n'ububiko bucuruza serivisi z'amakuru y’ikoranabuhanga.

Naho ingomero zitunganya amazi n'imashini ziyohereza aho agomba gukoreshwa bazajya bishyura 133 Frw. 

Naho sitasiyo zo kongera amashanyarazi mu binyabiziga zizajya zishyura kilowateli imwe amafaranga 110.

Inganda zikora ibyuma, izikora sima, izijyanye n'ubucukuzi bw'amabuye y'agaciro zikoresha umuriro w' amashanyarazi ari hejuru ya 1 000 000 zizajya zishyura 97. Naho izindi nganda zikoresha umuriro uri hagati ya kilowateli 100 000 na miliyoni imwe bazajya bishyura amafaranga 133.

Itangazo rivuga ko ibi biciro bitariho umusoro ku nyongeragaciro (TVA). Naho abakoresha amashanyarazi mu nganda bahabwa ibiciro byoroheje hagendewe ku ngano y’amashanyarazi zikoresha, kandi hashyirwaho inyongera ku nganda zikora mu masaha y’ijoro, ni ukuvuga kuva saa tanu z'ijoro kugera hafi saa mbiri z'igitondo, aho ibikorwa bikoresha amashanyarazi biba bitangiye.