Abagabo babiri bafatiwe mu cyuho bakora ibinyobwa bitujuje ubuziranenge

Aba bagabo bafashwe mu  bikorwa bigamije kurwanya ikwirakwizwa ry'ibinyobwa bitujuje ubuziranenge bikorerwa mu bice bitandukanye. Mu rukerera rwo ku wa 24 Ukuboza (12) 2025,  ibikorwa byabereye mu midugudu ya Bugesi, mu Kagari ka Mburabuturo na Susa muri Kivugiza, mu Murenge wa Muko mu Karere ka Musanze.

Abaturage bongeye kwibutswa ko bakwiye kwirinda kunywa ibi binyobwa bitujuje ubuziranenge kuko usibye kuba ari imvano y’uburwayi butandukanye, biba n’intandaro y’umutekano muke n’urugomo mu mu miryango y'ababikoresha.

IP Ignace Ngirabakunzi; Umuvugizi wa Polisi mu Ntara y’Amajyaruguru yasabye abaturage gukomeza gufatanya n’inzego za Leta mu kurwanya ibi binyobwa byuzuye inenge kuko kubikoresha bigira ingaruka nyinshi, bityo hakenewe umusanzu wa buri wese.

Ati: “Amakuru twamenye n’uko ababikora bo badashobora kubinywa cyangwa ngo abihe umwana we kubera ko azi ingaruka zabyo. None n’uba ukora ibyo binyobwa yirinda kubinywa kuko bitujuje ubuziranenge, undi muturage we atinyuka ate? Twese dukwiye kumenya ububi bwabyo, tukabirwanya kugeze bicitse.”

Yanavuze ko hari gahunda ya Polisi ari ugukomeza ibikorwa byo guca intege abakora ibinyobwa byuzuye inenge.

"Gahunda ni ugukomeza ibikorwa nk’ibi byo guca intege abakora ibi binyobwa byuzuye inenge ariko n’umuturage akumva ko afite inshingano zo kwirinda kuko iyo abinyweye ariwe bigiraho ingaruka bwa mbere.”

Polisi y’u Rwanda yongera kwibutsa mu bice binywererwamo ibinyobwa nka Muriture n’ibindi bitujuje ubuziranenge usanga higanza ibyaha bikorerwa mu ngo n’amakimbirane mu miryango, abaturage bagasabwa kubyamaganira kure.

IP Ngirabakunzi yasabye abantu kwirinda bene ibi binyobwa, by’umwihariko muri ibi bihe byo kwizihiza iminsi mikuru isoza umwaka, kuko bishobora kubabera inkomyi mu kunezerwa ndetse n'umutekano wabo.

Ni mu gihe abagabo bafashwe bashyikirijwe inzego zibishinzwe kugura ngo bagirwe inama ndetse banacibwe amande nk’uko amategeko abiteganya.