Kinyarwanda
English
CentrAfrica: Abatavuga rumwe n’ubutegetsi bise ikinamico ibyavuye muri Kamarampaka byemerera Perezida Touadéra kwiyamamaza !
Abatavuga rumwe n’ubutegetsi bwa Perezida Faustin-Archange Touadéra wa Centrafrica bavuga ko ibyavuye mu matora ya Kamatampaka [Referendum] ari ikinamico. Amatora ya Kamarampaka yabaye ku ya 30 Nyakanga (07) yemeje ko umukuru w’igihugu kwiyamamaza inshuro zose ashaka.
Akanama k'amatora ku wa mbere katangaje ko 95% by'abatoye bashyigikiye impinduka mu itegekonshinga. Nimugihe abanenga ubutegetsi bavuga ko ubwitabire muri ayo matora bwari hasi y’ikigero cya 10% kuri miliyoni 6 z’abatuye Centrafrica.
Gusa iki gihugu kiracyari mu bihe bigoye by'intambara byatumye kimwe cya gatatu (1/3) cy'abo baturage bahunga bakava mu byabo.
Ibyavuye muri kamarampaka ni mu buryo by'agateganyo,mugihe biteganyijwe gufatwaho umwanzuro n'urukiko rurinda iremezo ry'itegekonshinga, icyemezo cyarwo kikaba kizatangazwa ku ya 27 Kanama (8), uyu mwaka.
Iryo tegekonshinga rishya kandi ryongera igihe cya manda ya perezida kikava ku myaka itanu ikaba irindwi, ndetse rigakuraho igihe gisanzweho cya manda ebyiri ntarengwa.
Perezida Faustin-Archange Touadéra, w'imyaka 66, kur’ubu ushyigikiwe n'abarwanyi b’abacanshuro b'Abarusiya ba Wagner, yageze ku butegetsi mu 2016. Bijyanye n'izo mpinduka ku itegekonshinga zatorewe, ashobora kuziyamamariza manda ya gatatu mu matora ateganyijwe mu mwaka w’2025. Mu gihe yaba atowe, ashobora kumara nibura imyaka 16 yose ari ku butegetsi.
Muri Kamarampaka kandi, harimo izindi mpinduka zibuza abanyapolitiki bafite ubwenegihugu bubiri kwiyamamariza kuba perezida, keretse igihe babanje kureka ubundi bari bafite.
